08.04.2023-cü il tarixində Saatlı rayonunda Azərbaycan Gənclər Fondunun “İdeyanı Reallaşdır -2022” Qrant Müsabiqəsinin qalib layihələrindən olan “Foto Akademiya” layihəsinin bağlanış tədbiri keçirildi.
Heydər Əliyev Mərkəzində keçirilən tədbirdə layihədə iştirak edən 15 nəfər gənc iştirak etdi. Tədbirdə layihə müddətində görülən işlər və layihənin davamlığı üçün nəzərdə tutulan planlar haqqında ictimaiyyətə geniş məlumat verildi.
Aran Xəbərə müsahibə verən layihə rəhbəri, gənc fotoqraf və təlimçi kimi fəaliyyət göstərən Ramil Süleymanov bildirdi ki, layihəni yazarkən “Gənc istedat” qrantı istiqamətini seçdim. Məqsədim rayonumuzda istedadlı gəncləri bir araya topalmaq, özünü inkişaf etdirmək istəyən, işsiz və həvəskar fotoqraflardan bir komanda formalaşdırmaq idi. Bu səbəbdən layihənin icra müddətində iştirakçı gənclərlə onların inkişafı istiqamətində ardıcıl iş aparmışıq. Hesab edirəm ki, yaxın gələcəkdə bu işlərin nəticəsi olaraq regionumuzda bu sahədə xeyli aktiv və istedadlı gənc görəcəyik. Bu gənclər hər biri ölkəmizin inkişafına öz töhfəsini vermiş olacaq.
R. Süleymanovun sözlərinə görə, 5 ay davam edən layihədə fotoqrafiyanı öyrənmək istəyən 15 nəfər gənc foto və video təlimlərinə cəlb edilib. Həftədə 2 dəfə keçirilən təlimlərdə təlimçi Gülağa Hüseynli və Aslan Muxtasimov gənclərlə ardıcıl iş aparmış, müxtəlif öyrətmə üsullarından istifadə edərək gənclərin bacarıqlarını inkişaf etdirmişlər.
Tədbirin sonunda iştirakçılara sertifikatlar təqdim edildi.
