Avropa Ittifaqının maliyyə dəstəyi ilə “Bərdə Peşə Liseyinin Modernləşdirilməsi” Layihəsi çərçivəsində həyata keçirilən Usta yanında Şəyirdlik (Apprenticeship) proqramı və layihə çərçivəsində Məsləhət Şurasının yaradılması ilə əlaqədar, ötən günlərdə Bərdə şəhərində sahibkar
və işəgötürənlərlə birlikdə görüş təşkil edilib.
Görüş zamanı regiondan olan işəgötürənlər və mütəxəssislərlə fikir mübadiləsi aparılıb, şəyirdlik proqramının icra olunması, Məsləhət Şurasının Yaradılması və onun tərkibinin müəyyən edilməsi istiqamətində müzakirələr aparılıb.
Layihə eksperti Səbinə Ədilova bildirib ki, “Ustayanında Şəyirdlik” proqramı pilot proqramlar (Bitkiçilik və Baramaçılıq ixtisasları) üzrə təhsil proqramının əsas hissəsidir. Bu proqram modullar üzrə tələbələrin əsas və peşə səriştələrinin əldə edilməsinə xidmət edir. Eyni zamanda praktik dərslərin işəgötürən müəssisədə təşkil edilməsi tələbələrin iş yerinin əsas
xüsusiyyətlərini dərk etmək, komanda halında çalışmaq vərdişlərini formalaşdırır. Proqrama kursun mənimsənilməsinin nəticələrinə verilən tələblər, tələbələrin ümumi və peşə səriştələri daxil edilə bilər. Bu “Ustayanında Şəyirdlik” Proqramına dərs saatları haqqında məlumat, proqramın məzmunu və quruluşu, işçi tədris planı və kurslar üzrə ustayanında şəyirdliyin PTT elementləri daxil edilməklə illik tədris – təqvim qrafikləri daxil edilmişdir. Eyni zamanda, ekspert bildirib ki, Bərdə Peşə Liseyində peşə təhsilinin və təliminin təşkili üzrə Məsləhət Şurası lisey ilə işəgötürənlərin ustayanında şəyirdlik proqramının təşkili və gələcək inkişafı üzrə fəaliyyətlərin əlaqələndirilməsi üçün müzakirəedici və məsləhətçi orqandır. Tərkibi 6 nəfərdən ibarət olan Məsləhət Şurasının əsas vəzifələrinə şəyirdlik proqramının təşkili və icrasına aid təkliflər hazırlamaq, eyni zamanda, Peşə məktəbi və işəgötürən müəssisələr arasında razılaşma və müqavilələrin hazırlanması və imzalanmasına köməklik göstərilməsi və s.dir.
Qeyd edək ki, “Bərdə Peşə Liseyinin modernləşdirilməsi” layihəsi 2017-ci ilin oktyabr ayından etibarən Avropa İttifaqının maliyyə dəstəyi ilə Yerli İdarəetməyə Yardım İctimai Birliyi tərəfindən həyata keçirilir.
