Türkiyədə 6,8 bal gücündə zəlzələ baş verib.
aranxeber.com xəbər verir ki, bu barədə Türkiyənin Fövqəladə Halların İdarə Olunması Agentliyi (AFAD) məlumat yayıb.
Yeraltı təkanlar Elazığ şəhərinin Sivrice rayonunda bu gün saat 20.55-də qeydə alınıb. Təkanların ocağı yerin 7 kilometr dərinliyində olub. Baş verən güclü zəlzələ nəticəsində dörd nəfər ölüb.
Türkiyənin Daxili İşlər naziri Süleyman Soylu mətbuata bildirib ki, Malatyada iki, Elazığda iki nəfər ölüb.
Onun sözlərinə görə, Elazığın Mədən rayonunda 5 mərtəbəli yaşayış binası çöküb:
“Həmin binada yaşayış olub. Xilasedicilər hadisə yerinə cəlb edilib. Dağıntı altında qalan insanları çıxarmağa çalışırlar. Bir nəfər sağ olaraq dağıntılar altından çıxarılıb. Ümid edirəm ki, çox itkimiz olmaz”.
Avropa Aralıq Seysmologiya Mərkəzinin məlumatına görə, zəlzələ İsrail, İraq və Suriyada da hiss olunub.
